అంతరించిపోతున్న మానవుడు!

అంతరించిపోతున్న మానవుడు!

అవును నువ్వు విన్నది నిజమే

మనిషి అంతరించిపోతున్నాడు.

సగటు జీవి అవసరాలను ఆసరాగా చేసుకొని

నరకం అనుభవిస్తున్న వారిని చూసి నవ్వుతూ

అర్ద రూపాయి బతుకుల మీద ముప్పావలా భారం మోపుతూ

అధికార శిఖరాల అంచున నిలబడి అహావతారమెత్తి తరలిపోయాడు.

సమాజానికి తండ్రి స్థానాన నిలబడ్డ మరో తండ్రి జేబుల్లో చిల్లర లాక్కుని బెత్తంతో వాయిస్తున్నాడు.

ఆయువు పోసే శ్వేత వస్త్రాలు రక్తం పీల్చి రంగుమారాయి.

అన్యాయాన్ని న్యాయంగా అమ్ముతూ

కులాల గజ్జితో కొట్టుమిట్టాడుతూ

మత్తులో మగతగా తూలుతూ వాలుతూ

మతోన్మాద మదొన్మాదాల పెట్రేగిపోతూ

తల్లెవరో చెల్లెవరో ఇల్లాలు ఎవరో తెలియక

అంతరించి పోయాడు.

గాలినిచ్చే మొక్కను, పాలనిచ్చే గోవును, గొంతుతడిపే నదులను, కడుపునింపే నేలను

నరుకుతూ,చంపుతూ,కలుషాలను కలుపుతూ, శక్తిమేర తవ్వుతూ

కానీ...

నేను అంతరించి పోతున్నాని ఏనాడూ మనిషి ఒప్పుకోడు.

సింహం, పులి, పిల్లి ఎలుక, పందులూ కుక్కలూ ఏ జంతువూ కూడా వాటి లక్షణాలను చచ్చేవరకు మరిచిపోవు. అవి చచ్చేవరకు గీత దాటవు.

అయితే మానవత్వ, నిష్కల్మష అవతారం లో భూమిపై పాదం మోపే మానవుడు

కుళ్ళు కుతంత్రాలని నింపుకొని దానవునిగా అవతరించాడు.

గొంగళి పురుగు ఈ ప్రాణికోటిలో ఒక చిన్న జీవి

కానీ అది ఎతో అందమైన సీతాకోకచిలుక అయింది.

కానీ మానవుడు అనేక రుపాలుగా మారుతున్నాడు.

వికృత రూపాలు అసంఖ్యాకంగా ఎత్తుతూ

నిజమైన మానవుడు అంతరించిపోయాడు.